Image Copyrights: https://flic.kr/p/fBesCv

രുചികളിൽ ലഹരി കലരുമ്പോൾ

നുഷ്യനുണ്ടായ കാലം മുതൽ, ലോകത്തിലെ എല്ലാ സംസ്കാരങ്ങളും മയക്കുമരുന്നുകൾ ഉപയോഗിച്ചിരുന്നു എന്നാണ് കരുതപ്പെടുന്നത്. നിത്യജീവിതത്തിലെ മാനസികസമ്മര്‍ദ്ദങ്ങളിൽ നിന്നൊരു മാറ്റത്തിനു വേണ്ടിയാവണം അന്നും മനുഷ്യർ മയക്കുമരുന്നുകളെ ആശ്രയിച്ചിരുന്നത്. പുരാതന ഈജിപ്തിലും, ഇന്ത്യയടക്കമുള്ള ഏഷ്യൻ രാജ്യങ്ങളിലും, ഗ്രീസിലും, ചൈനയിലും ഒക്കെ മതപരമായ ചടങ്ങുകളിൽ വരെ മയക്കുമരുന്നുകൾ ഉപയോഗിച്ചിരുന്നു. അങ്ങനെ കൂട്ടത്തോടെ ദൈവാരാധനയ്ക്കായി മയക്കുമരുന്നുകൾ ഉപയോഗിക്കുന്നവർ ഡ്രഗ് കൾട്ട് (Drug Cult) എന്ന പേരിലാണ് അറിയപ്പെടുന്നത്. കേരളത്തിൽ വളരെ സാധാരണയായി ഉപയോഗിക്കുന്ന വെറ്റിലമുറുക്ക് നല്ലൊരു മയക്കുമരുന്ന് പ്രയോഗം തന്നെയാണ്.

ഇന്ത്യയിൽ ഉണ്ടാക്കുന്ന ഓപിയം നല്ലൊരു ശതമാനം വിറ്റഴിക്കാൻ ഏറ്റവും നല്ല മാർഗം അത് ചൈനയിൽ എത്തിക്കുക എന്നതാണെന്ന് ബ്രിട്ടീഷ് ഗവണ്മെന്റ് മനസ്സിലാക്കുകയും നന്നായി വിനിയോഗിക്കുകയും ചെയ്തു. നിയമപരമല്ലാതെ ബ്രിട്ടണ്‍ നടത്തിയ ഈ കച്ചവടത്തിനെതിരെ അന്നത്തെ ചൈനീസ്‌ ചക്രവർത്തി നടത്തിയ യുദ്ധമാണ് ‘ഓപിയം വാർ’

പതിനെട്ടാം നൂറ്റാണ്ടിൽ ചൈനയിൽ ഓപിയം അഡിക്ഷൻ (Opium Addiction) എന്നൊരവസ്ഥ ഉണ്ടാകുകയും തുടർന്ന് ഓപിയം വാർ (Opium War) എന്നറിയപ്പെടുന്ന യുദ്ധത്തിലേക്ക് എത്തുകയും ചെയ്തിട്ടുണ്ട്. ചൈനയുമായി വ്യാപാരത്തിന് ആഗ്രഹിച്ചിരുന്ന ബ്രിട്ടന്‍, അവിടെ വിദേശീയർക്ക് കച്ചവടം നടത്തുന്നതിനുള്ള അവകാശം പതുക്കെ സ്ഥാപിച്ചെടുത്തു. ചായയായിരുന്നു ആദ്യം കച്ചവടം നടത്തിയത്. അന്ന് ചായയുടെ വിലയായി വെള്ളി മാത്രമായിരുന്നു ചൈന സ്വീകരിച്ചിരുന്നത്. അത് ബ്രിട്ടന് ലാഭം ഉണ്ടാക്കുന്നതായിരുന്നില്ല. പലതരത്തിലുള്ള കച്ചവടങ്ങൾക്കു വേണ്ടി ബ്രിട്ടന്‍ ശ്രമിച്ചെങ്കിലും ചൈനീസ്‌ ചക്രവർത്തികൾക്ക് മുന്നിൽ അതൊന്നും വിലപ്പോയില്ല. അന്ന് ഇന്ത്യയിൽ അധികാരം സ്ഥാപിച്ച ബ്രിട്ടന്‍, ഇവിടെ വൻതോതിൽ കൃഷി ചെയ്തിരുന്ന ഓപിയം ചൈനയിലേക്ക് കയറ്റി അയക്കുന്നതിന്റെ സാധ്യത മനസ്സിലാക്കി. ചൈനയിൽ, ഓപിയം നിരോധിച്ചിരുന്ന മയക്കുമരുന്ന് തന്നെയായിരുന്നെങ്കിലും, മരുന്നുകൾ ഉണ്ടാക്കുന്നതിനായി ചെറിയ രീതിയിൽ അതിന്റെ ഉപയോഗം നൂറ്റാണ്ടുകളായി അവിടെ ഉണ്ടായിരുന്നു. പിന്നീട് പുകയിലയുമായി ചേർത്ത് ആളുകൾ വലിയതോതിൽ അതുപയോഗിക്കാൻ തുടങ്ങിയതോടെ, പതിനേഴാം നൂറ്റാണ്ടിൽ ഓപിയം ഉപയോഗം ചൈന നിരോധിച്ചു. എങ്കിലും നൂറു വർഷം കഴിഞ്ഞു ബ്രിട്ടന്‍ വീണ്ടും ചൈനക്കാരുടെ ഓപിയം പ്രിയം മനസ്സിലാക്കി അവസരം മുതലെടുത്തു. ഇന്ത്യയിൽ ഉണ്ടാക്കുന്ന ഓപിയം നല്ലൊരു ശതമാനം വിറ്റഴിക്കാൻ ഏറ്റവും നല്ല മാർഗം അത് ചൈനയിൽ എത്തിക്കുക എന്നതാണെന്ന് ബ്രിട്ടീഷ് ഗവണ്മെന്റ് മനസ്സിലാക്കുകയും നന്നായി വിനിയോഗിക്കുകയും ചെയ്തു. നിയമപരമല്ലാതെ ബ്രിട്ടണ്‍ നടത്തിയ ഈ കച്ചവടത്തിനെതിരെ അന്നത്തെ ചൈനീസ്‌ ചക്രവർത്തി നടത്തിയ യുദ്ധമാണ് ‘ഓപിയം വാർ’. യുദ്ധത്തിൽ ചൈന തോല്ക്കുകയും കൂടുതൽ തുറമുഖങ്ങൾ കച്ചവടത്തിനായി ബ്രിട്ടനു തുറന്നു കൊടുക്കേണ്ടി വരുകയും ചെയ്തു.

ഇന്ന് ലോകത്തിലെ പല രാജ്യങ്ങളും വൈദ്യോപയോഗത്തിനായി പല മയക്കുമരുന്നുകളുടെ ഉപയോഗം നിയമപരമാക്കിയിട്ടുണ്ടെങ്കിലും, വിനോദത്തിനായി ഉപയോഗിക്കുന്നത് നിയമത്തിനെതിരാണ്. പക്ഷെ മരിയുവാന (Marijuana) എന്ന മയക്കുമരുന്ന്, യൂറോപ്യൻ രാജ്യങ്ങൾ ആയ നെതർലണ്ട്സ്, സ്വിറ്റ്സർലൻഡ് എന്നിവിടങ്ങളിൽ നിയമപരമായി ഉപയോഗിക്കുന്നുണ്ട്. അമേരിക്കയിലെ ചുരുക്കം ചില സംസ്ഥാനങ്ങളിൽ ഇപ്പോൾ നിയമപരമായി ഇതുപയോഗിക്കാൻ തടസ്സങ്ങൾ ഇല്ല. രണ്ടായിരത്തിപ്പതിനാല് ജനുവരി മുതലാണ്‌ ഇവിടെ മരിയുവാന വിനോദത്തിനായും ഉപയോഗിക്കുവാൻ നിയമം ഉണ്ടായത്. പല രീതിയിലുള്ള എതിർപ്പുകൾ പലഭാഗത്തു നിന്നും ഉണ്ടായെങ്കിലും അനുകൂലിക്കുന്നവരുടെ എണ്ണം ആണ് കൂടുതൽ. മരിയുവാന മദ്യത്തോളം അപകടകാരി അല്ല എന്ന് മാത്രമല്ല പല രീതിയിലും ആരോഗ്യത്തെ സംരക്ഷിക്കുന്നുമുണ്ട് എന്നാണ് അടുത്തയിടെ നടത്തിയ പല പഠനങ്ങളും കാണിക്കുന്നത്.  സയൻസ് ഡയറക്റ്റ് പ്രസിദ്ധീകരിച്ച മറ്റൊരു പഠനത്തിൽ മദ്യപാനം അധികമായതിനെത്തുടർന്ന് ഉണ്ടാകുന്ന ബ്രെയിൻ ഡാമേജിനെ തടയാൻ മരിയുവാന ഉപയോഗത്തിന് സാധിച്ചേക്കാം എന്നും പറയുന്നുണ്ട്.

മനുഷ്യരുടെ പ്രധാന വിനോദോപാധികളായ മദ്യപാനത്തിനും പുകവലിയ്‌ക്കും തൊട്ടുപുറകിൽ മൂന്നാം സ്ഥാനത്താണ്‌ മരിയുവാന ഉപയോഗം. മരിയുവാനയുടെ പല നല്ല വശങ്ങളും പഠനങ്ങളിലൂടെ തെളിഞ്ഞിട്ടുണ്ട്. ഗ്ലൂക്കോമ തടയുന്നതിൽ മരിയുവാന ഒരു പങ്കു വഹിക്കുന്നു എന്ന് നാഷണൽ ഐ ഇൻസ്റ്റിറ്റ്യൂട്ടിന്റെ (National Eye Institute) പഠനത്തിൽ പറയുന്നു. മരിയുവാന ഉപയോഗം, പുകവലി പോലെ ശ്വാസകോശത്തിന്റെ പ്രവർത്തനങ്ങളെ ബാധിക്കുന്നില്ല എന്നും, മറിച്ച് ശ്വാസകോശത്തെ ശക്തിപ്പെടുത്തുകയാണ് എന്നും അമേരിക്കൻ മെഡിക്കൽ അസോസിയേഷൻ ജേർണലിൽ പ്രസിദ്ധീകരിച്ച പഠനത്തിൽ പറയുന്നു. കാൻസർ പടരുന്നത്‌ തടയാൻ മരിയുവാനയ്‌ക്ക്‌ കഴിയുന്നുണ്ടെന്നും കാലിഫോർണിയ പെസിഫിക് മെഡിക്കൽ സെന്ററിലെ (California Pacific Medical Center) പഠനം തെളിയിക്കുന്നു. ഒരു വശത്ത് മരിയുവാനയുടെ ഗുണങ്ങൾ പഠനവിധേയമാക്കുമ്പോഴും മറുവശത്ത്, നിയമവിധേയമാക്കിയാൽ ഉണ്ടാകുന്ന ഭവിഷ്യത്തുകളെക്കുറിച്ചുള്ള ആശങ്കകൾ ഏറുന്നു.

ഡെന്മാർക്കിന്റെ തലസ്ഥാനമായ കോപെൻഹേഗനിലുള്ള ക്രിസ്ടിയാനിയ (Christiania) എന്ന പട്ടണം ഫ്രീടൌണ്‍ എന്നാണ് അറിയപ്പെടുന്നത്. സ്വന്തമായ നിയമങ്ങളുള്ള ഈ പട്ടണത്തിൽ മരിയുവാനയുടെ വില്പന വളരെ പരസ്യമായിട്ടാണ് നടക്കുന്നത്. ഡെന്മാർക്കിൽ നിയമവിരുദ്ധമായ ഈ മയക്കുമരുന്നിന് ക്രിസ്ടിയാനിയയിൽ നിയന്ത്രണങ്ങൾ ഇല്ലായിരുന്നു. പക്ഷെ രണ്ടായിരത്തിനാലില്‍ ഡെന്മാർക്ക്‌ ഗവണ്മെന്റ് ഈ സ്ഥലത്ത് നിയന്ത്രണങ്ങൾ കൊണ്ടു വരാൻ ശ്രമിക്കുകയും കൂടുതൽ വിപ്ലവങ്ങളിലേക്ക് ആ ശ്രമം എത്തുകയും ചെയ്തു. ഇതേത്തുടർന്ന് പുറത്തു നിന്നുള്ള പല കൂട്ടായ്മകളും മരിയുവാന സ്വതന്ത്രമായി വിൽക്കാനുള്ള അവകാശത്തിനായി ക്രിസ്ടിയാനിയ കയ്യേറാൻ ശ്രമിക്കുകയുണ്ടായി. ജനങ്ങളിൽ മയക്കുമരുന്നിനുള്ള സ്വാധീനം യുദ്ധത്തിലേക്ക് എത്താനുള്ള സാഹചര്യം ഉണ്ടാക്കും എന്നതിന് തെളിവാണ് ഡെന്മാർക്കിലെ ഈ പ്രദേശത്തെ വിപ്ലവങ്ങൾ. ഇന്നും തുടർന്നു പോരുന്ന സമരങ്ങൾക്കും വെടിവെയ്പുകൾക്കും മരണങ്ങൾക്കും പ്രധാന കാരണമായി മയക്കുമരുന്ന് ഉപയോഗം അവിടെ നിലനില്ക്കുന്നു.

കൊളൊറാഡോയിൽ നിയമപരമായി മരിയുവാന ഉപയോഗിക്കാം എന്ന നിയമം വന്നതോടെ ഭക്ഷണസാധനങ്ങളിൽ അതുപയോഗിക്കുന്നവരുടെ എണ്ണം വർദ്ധിച്ചു. പോട്ട് ബ്രൌണി (Pot Browny) രൂപത്തിലാണ് മരിയുവാന ഏറ്റവും കൂടുതൽ ഉപയോഗിച്ചിരുന്നതെങ്കിലും ഇപ്പോൾ സ്നാക്ക്സ്, ജ്യൂസ്, ഗ്രനോല ബാർസ്, ചോക്ലേറ്റ്, സ്പഗെറ്റി സോസ്, കുക്കീസ്, ഒലിവ് ഓയിൽ എന്നിവയിലും ഇതുപയോഗിക്കുവാൻ തുടങ്ങി. മരിയുവാനയിൽ നിന്നും വേർതിരിച്ചെടുക്കുന്ന ടിൻചർ (Tincture) വീട്ടിലും ഉപയോഗിക്കാൻ പാകത്തിന് വിപണിയിൽ ലഭ്യമാണ്. പുകവലിയ്ക്ക് പകരം ഭക്ഷണം ആയി മരിയുവാന ഉപയോഗിക്കുന്നതാണ് കൂടുതൽ സൗകര്യം എന്നാണ് ഉപയോഗിക്കുന്നവരുടെ സാക്ഷ്യം. മരിയുവാനയുടെ ഇലയിൽ നിന്നെടുക്കുന്ന ടെട്രഹൈഡ്രോ കനാബിനോള്‍ (THC) ആണ് ഭക്ഷണങ്ങളിൽ ചേർക്കുന്നത്. ഇത് ശ്വാസകോശത്തെക്കാൾ വയറിനെയും ദഹനപ്രക്രിയയെയും ആണ് കൂടുതൽ ബാധിക്കുന്നത്. അതുകൊണ്ടുതന്നെ പുകവലിയെക്കാളും ലഹരി തരാൻ മരിയുവാന ഉപയോഗിച്ച ഭക്ഷണത്തിന് സാധിക്കുന്നു. പക്ഷെ കുട്ടികളെ ആകർഷിക്കുന്ന ചോക്ലേറ്റ്, ജ്യൂസുകൾ, ബിസ്കറ്റുകൾ, കുക്കീസ്, സോഡ എന്നിവ ആശങ്കയ്ക്ക് ഇടയാക്കുന്നവയാണ്. ഇത്തരം ഭക്ഷണപദാർത്ഥങ്ങൾ പെട്ടെന്ന് കുട്ടികളുടെ കൈയിലെത്തുകയും കൌമാരപ്രായക്കാരിൽ അത് ആസക്തിയിലേക്ക് വളരുകയും ചെയ്യാനുള്ള സാധ്യത വളരെ കൂടുതലാണ്. കുട്ടികളെ ആകർഷിക്കാത്ത തരം പാക്കിംഗ് ആയിരിക്കണം, ഉണ്ടാക്കാൻ ഉപയോഗിച്ചിട്ടുള്ള പദാർത്ഥങ്ങളുടെ പേര് വ്യക്തമായി എഴുതിയിരിക്കണം എന്നൊക്കെയാണ് കുട്ടികളെ ഇതിൽ നിന്നും തടയാൻ ഉള്ള മാർഗങ്ങൾ. എത്രത്തോളം ഫലപ്രദമാണ് അത് എന്നത് ഇപ്പോഴും മാതാപിതാക്കൾക്കും, ഡോക്ടർമാർക്കും ആശങ്കയ്‌ക്ക്‌ വക നൽകുന്നു.

കൊളൊറാഡോയിലെ പല റെസ്റ്റോറന്റുകളും മരിയുവാന ഉപയോഗിച്ചുള്ള ഭക്ഷണപദാർത്ഥങ്ങൾ ഉണ്ടാക്കുന്നുണ്ട്. ഡെൻവെറിൽ ഉള്ള ഗോർമെറ്റ് ഗഞ്ജ (Gourmet Ganja) എന്ന റെസ്റ്റോറന്റിൽ പിസ്സ, ലസാഞ്ഞ്യ, ഹമ്മുസ് എന്നിവയൊക്കെ മരിയുവാന ചേർത്ത പ്രത്യേക വിഭവങ്ങൾ ആണ്. മരിയുവാനയുടെ ഇലകളും മൊട്ടും പൊടിയാക്കി വച്ച്, അത് എണ്ണയിലോ ബട്ടറിലോ ചേർത്ത് സാവധാനം വേവിച്ചെടുക്കും. മരിയുവാനയിൽ അടങ്ങിയിട്ടുള്ള ടെട്രഹൈഡ്രോ കനാബിനോൾ (THC) എണ്ണയിലെ കൊഴുപ്പിൽ അലിഞ്ഞുചേരാൻ ഒന്നോ രണ്ടോ ദിവസമെടുക്കും. പിന്നീട് അത് അരിച്ചെടുത്താൽ കിട്ടുന്ന ഉല്പന്നത്തിനെ കാന്നബട്ടർ (Cannabutter) എന്ന് പറയുന്നു. ഇതാണ് ഭക്ഷണപദാർത്ഥങ്ങളിൽ ചേർക്കുന്നതും ലഹരി നല്കുന്നതും. മരിയുവാന ഭക്ഷണത്തിൽ ഉപയോഗിക്കുന്ന ഷെഫുകളുടെ അഭിപ്രായത്തിൽ, ഇരുപതു മിനുട്ട് മുതൽ രണ്ടു മണിക്കൂർ വരെയാണ് ഭക്ഷണത്തിൽ ചേർത്തിരിക്കുന്ന കാന്നബട്ടർ പ്രവർത്തിച്ചു ലഹരി ലഭിച്ചു തുടങ്ങുന്നത്. കഴിച്ച ഉടനെ ലഹരി ഇല്ല എന്നത് ഒരു പോരായ്മ ആയാണ് അറിയപ്പെടുന്നത്. അതുകൊണ്ടു തന്നെ കൂടുതൽ അളവിൽ മരിയുവാന ചേർത്ത ഭക്ഷണം കഴിക്കാൻ ആളുകള്‍ പ്രേരിതരാവും എന്നതാണ് മറ്റൊരു പ്രശ്നം.

മദ്യപാനം നല്ലതോ ചീത്തയോ എന്നുള്ള ചർച്ചകൾക്ക് മദ്യപാനത്തോളം തന്നെ പഴക്കമുണ്ട്. പരിമിതമായ മദ്യപാനം ആരോഗ്യത്തിന് നല്ലതാണ് എന്നുള്ള വാദം പോലെ മരിയുവാനയും നിയമപരമാക്കിയത് സമൂഹത്തെ ഏതു രീതിയിൽ ബാധിക്കും എന്നതും തർക്കവിഷയം ആയിരിക്കുന്നു. എന്തായാലും ആദിമ മനുഷ്യനിൽ നിന്ന് തുടങ്ങിയ മയക്കുമരുന്ന് ഉപയോഗം ലോകത്തിലെ എല്ലാ സംസ്കാരങ്ങളിലും ഇന്നും മാറ്റമില്ലാതെ തുടരുന്നു.


Manju Manojമഞ്ചു മനോജ് | Manju Manoj

ഗണിതശാസ്ത്രത്തിൽ ആണ് ബിരുദമെങ്കിലും, വായനയും യാത്രയും ഇഷ്ടപ്പെടുന്ന, ചിത്രതുന്നൽ തന്നെ ജീവിതം എന്ന് കരുതുന്ന, വല്ലപ്പോഴും എന്തെങ്കിലും കുത്തിക്കുറിക്കുന്ന ഒരാൾ. കുത്തികുറിക്കലുകൾ ഇവിടെയും , ചിത്രതുന്നൽ ഇവിടെയും.

A Mathematics Graduate. Apart from that, interests are varies from reading, writing blogs,travel, to Embroidery and quilting. But the real passion is Embroidery. Blog is here and embroidery is here.


Cover Image Copyrights – Don Goofy

Leave a Comment